Sports Minister Lalnghinglova Hmar chuan Thenzawl chu Mizoram khaw laili leh pan nuam, mipui thahnem tak pawh punkhawm theihna tur a ni tiin, Loṭhazawl field-a artificial turf phah tur pawh inkhel pawimawh tak tak thleng thei ngei turin uluk tak leh a len zawngah pawh international match khelh theihna tling ngeia phah a nih tur thu a sawi.

Sports Minister chuan sawi chhunzawmin, Sawrkarin Thenzawl mai bakah Serchhip District hmasawnna’n theihtawp a chhuah tih sawiin, NESIDS-OTRI atanga Serchhip-a Multipurpose Indoor Hall sakna tur DPR submit a nih tawh thu leh, hei pawh hi hmuh thuai beisei a nih thu a sawi bawk a ni. 

Loṭhazawl field, Thenzawl-a artificial turf phah tur hi PMJVK scheme hnuaiah Rs. 11.85 Cr. sanction tawh a ni a.

Tunah hian tihfel ngaite tihfel thawkhat tawh niin, tender chhuah thuai turin chak taka hma lak mek a ni.  

Minister in football ground a tlawhnaah hian Thenzawl Zone Football Association aiawh leh khawtlang hruaitute’n an tawiawm a, Serchhip District FA hruaitute hriattir an ni bawk a ni.